कांग्रेस सभापति कप : फुटबलको तालिका सार्वजनिक

काठमाडौं । नेपाली काँग्रेसको भ्रातृ संस्था नेपाल लोकतान्त्रिक खेलकुद सङ्घ महाधिवेशन निर्देशन समितिको आयोजनामा माघ १० गतेदेखि हुने सभापति कप फुटबल प्रतियोगिताको खेल तालिका सार्वजनिक गरेको छ ।

प्रतियोगितामा दुई विभागीय टोलीसहित ८ टीमले सहभागिता जनाएका छन् । माघ ११ गते मच्छिन्द्र र एपीएफ क्लब, १२ गते पुलिस क्लब र नेपाल लोकतान्त्रिक खेलकुद सङ्घ बागमती प्रदेश र माघ १३ गते एनआरटी र फ्रेन्ड्स क्लबबिच खेल हुने आयोजकले जनाएको छ । खेल नकआउट हुने छ भने १४ र १५ गते सेमिफाइनलका खेल हुने छन् । १६ गत एक दिन विश्राम राखिएको र त्यसै दिन उपाधि विजेताले पाउने ट्रफी सार्वजनिक गरिने छ । फाइनल खेल १७ गते हुने छ ।

प्रतियोगिताको विजेताले २६ लाख पुरस्कार पाउने छ भने उपविजेता टोलीले १३ लाख रुपैयाँ प्राप्त गर्नेछ । यसैगरी हरेक खेलमा म्याच फीको रूपमा प्रत्येक टिमले ५० हजार पाउने छन् भने प्लेयर अफ दी म्याचलाई १५ हजार रुपैयाँ प्रदान गरिने छ । फाइनलका दिन सर्वोत्कृष्ट खेलाडीलाई ७५ हजार, उत्कृष्ट गोलकिपरलाई ५० हजार, सर्वाधिक गोलकर्तालाई ५० हजार, उत्कृष्ट उदीयमान खेलाडीलाई २५ हजार प्रदान गरिने छ ।
प्रतियोगिताको अनुमानित बजेट १ करोड ४० लाख रुपैयाँ रहेको जानकारी गराउँदै आगामी दिनमा नेपालको लोकतान्त्रिक आन्दोलनमा योगदान गरेका व्यक्तित्वहरूको नाउँमा देशव्यापी प्रतियोगिताहरू आयोजना गर्ने प्रस्ट पारे । सभापति कप हरेक २–२ वर्षमा आयोजना हुने जानकारी गराए ।
पत्रकार सम्मेलनमा काँग्रेस सांसद एवं महाधिवेशन निर्देशन समितिका संयोजक मोहन बहादुर बस्नेतले नेपालमा खेल क्षेत्रको विकासका साथै खेलाडीहरूलाई स्वदेशमा नै अवसर प्रदान गर्ने उद्देश्यका साथ प्रतियोगिता आयोजना गरिएको जानकारी दिए ।
प्रतियोगिता कान्तिपुर टेलिभिजनमार्फत प्रत्यक्ष प्रशारण हुने छ । प्रत्यक्ष प्रशारणका सन्दर्भमा निर्देशन समितिका सदस्य गणेश लामा र कान्तिपुर टेलिभिजनका सिईओ सुरजसिंह ठकुरीबीच सम्झौता पत्रमा हस्ताक्षरसमेत भएको छ ।