कांग्रेसले केन्द्रीय सदस्यलाई जिल्लामा खटाउने

काठमाडौं । प्रमुख सत्तारुढ दल नेपाली कांग्रेसले सबै केन्द्रीय सदस्यलाई जिल्लामा खटाउने भएको छ । कांग्रेसले केन्द्रीय समितिको निर्णय अनुसार पार्टी संगठन सुदृढीकरणका लागि ७७ जिल्लामा केन्द्रीय सदस्य खटाउन लागेको हो ।

केन्द्रीय सदस्यहरुलाई दुई चरणमा जिल्लामा खटाइने कांग्रेसले जनाएको छ । कांग्रेसले पार्टीको आन्तरिक सांगठनिक सुदृढीकरण र राष्ट्रव्यापी अभियानका लागि केन्द्रीय सदस्यहरुलाई जिल्ला तोकेर जिम्मेवारी दिन लागेको महामन्त्री गगन थापाले जानकारी दिनुभएको छ । ‘अपूर्ण रहेको कार्यसमिति छ भने सबै संरचनामा पूर्णता दिने कार्य हुन्छ,’ उहाँले भन्नुभयो– ‘ ‘बैठक बस्न लगाउने, रिपोर्टिङ लिने, सम्मेलन भएको छैन भने मिति तोक्न लगाउने, सम्मेलन भएको रहेछ भने रिपोर्ट दिन लगाउने कार्य केन्द्रीय सदस्यहरुले गर्नुहुन्छ ।’

सांगठनिक सुदृढीकरणका लागि पहिलो चरणमा साउन २० देखि ३० गतेसम्मको समय तोकिएको छ । यस अवधि पार्टीको आन्तरिक कार्यमा केन्द्रीय सदस्यहरुले जिम्मेवारी निर्वाह गर्नेछन् । पहिलो चरणमा जिल्ला जाने केन्द्रीय सदस्य पूर्ण रुपमा पार्टीको आन्तरिक संरचनाका लागि कार्य गर्नेछन् ।

दोस्रो चरणको अभियान भदौ १० देखि २४ गतेका लागि तोकिएको छ । दोस्रो चरणलाई समुदायमा आधारित ‘राष्ट्रव्यापी अभियान’ भनिएको छ ।
केन्द्रीय सदस्यहरुले अभियानमा नागरिकसँग जोडिएर केन्द्रीय सदस्यहरुले गतिविधि गर्नुपर्ने हुन्छ ।

केन्द्रमा बनेको जस्तै वार्षिक क्यालेण्डर बनाउन लगाउने जिम्मेवारी पनि केन्द्रीय सदस्यको हुनेछ । ‘भ्रातृ संस्था, शुभेच्छुक संस्था, विभागलाई सबैलाई पूर्णता दिन लगाउने काम गर्नुहुन्छ । ‘नयाँ क्रियाशील वितरण, नवीकरण, अनलाइन प्रणाली जानकारी गराउने र कार्यान्वयनमा अघि बढाउने काम हुन्छ,’ महामन्त्री थापाले भन्नुभयो ।

केन्द्रीय समितिले प्रत्येक गाउँ वा नगर समितिले ‘सेवा दल’ बनाउने निर्णय गरेको थियो । सेवा दलको कार्यविधि जिल्ला खटिने प्रतिनिधिले केन्द्रबाट लगेका हुन्छन् । त्यस अनुसार सेवा दल गठनको प्रक्रिया शुरु गराउन सहजीकरण केन्द्रीय सदस्यहरुले गर्नेछन् ।

पार्टी भित्र विवादका कारणले आन्तरिक संरचनामा परेको समस्या समाधान गर्न केन्द्रीय सदस्यले भूमिका खेल्ने छन् ।