बाह्रबिसे बाढी-पाहिरोबाट घाइते एक जनालाई हेलिकप्टरबाट काठमाडौं ल्याइयो

काठमाडौं – सिन्धुपाल्चोक बाह्रबिसे नगरपालिका ५ जम्बुमा गए राति आएको बाढीपहिरोमा परी घाइते भएकामध्ये एक जनाको उद्धार गरिएको छ।

पहिरोबाट उद्धार गरिएकी स्थानीय सविना बस्नेतलाई कैलाश एअरलाइन्सको हेलिकप्टरबाट काठमाडौंको ह्याम्स अस्पताल ल्याइएको हो।

अर्का घाइते लिन फेरि हेलिकप्टर सिन्धुपाल्चोक गएको छ। सत्तारूढ नेपाल कम्युनिष्ट पार्टी नेकपाका केन्द्रीय सदस्य माधव सापकोटासहितको टोली घटनास्थल पुगेर घाइतेलाई काठमाडौं पठाएका हुन्।

‘एक जनाभन्दा बढी घाइतेलाई हेलिकप्टरले लैजान सकेन,’ सापकोटाले भने, ‘हामी घटनास्थलमै छौं। अर्का एक जना घाइते लिन फेरि हेलिकप्टर आउँदैछ।’

बाढी पहिरोमा परी घाइते भएका सुवेश वाइवालाई उद्धार गरेर राखिएको छ।

सापकोटासहितको टोली बिहीबार बिहान सिन्धुपाल्चोकका लागि उडे पनि काभ्रेमा २ घण्टा रोकिएका थिए।

मौसम सुधार भएपछि घटनास्थल पुगेर घाइतेलाई काठमाडौं पठाएको उनले बताए।