क्वारेन्टाइनमा महिला हिंसा बढिरहेका बेला सरकार के गर्दैछ ?

काठमाडौं । संसदीय समितिले क्वारेन्टाइनहरुलाई सुरक्षित र व्यवस्थित बनाउन महिला, बालबालिका तथा ज्येष्ठ नागरिक मन्त्रालयलाई निर्देशन दिएको छ ।

सांसदहरुले क्वारेन्टाइनहरु व्यवस्थित नभएको, गर्भवतीको पिसिआर परीक्षण समयमै नहुँदा समस्या भएको बताएका छन् । सांसद अमृता थापाले सुत्केरीको पिसिआर रिपोर्ट ढिला आउँदा अप्रेसनमा समस्या हुने गरेको बताइन् ।उनले पिसिआर परीक्षणलाई प्राथमिकता दिनुपर्नेमा जोड दिइन् । महिलाहरु रहेको क्वारेन्टाइनको सुरक्षाका लागि महिला प्रहरीको आवश्यकता रहेको उनले बताइन् । महिला प्रहरीको अभाव देखिए म्यादी महिला प्रहरी भर्नाको व्यवस्था मिलाउनुपर्ने सुझाव दिइन् र

सांसद हिरा गुरुङले क्वारेन्टाइनहरुमा महिलामाथि हिंसाका घटना बढिरहेको अवस्थामा मन्त्रालयले के गरिरहेको छ भन्दै प्रश्न गरिन् । क्वारेन्टाइनमा सुत्केरीले दुःख पाइरहेको उल्लेख गर्दै उनले मन्त्रालयको तर्फबाट के कस्तो सहयोग भइरहेको छ भने खोजी गरिन् ।

सांसद महेन्द्रकुमारी लिम्बुले महिलामाथि हुने हिंसाका घटनाहरुमा बोल्न नसक्ने मन्त्री र समिति सभापतिले राजीनामा दिनुपर्ने पर्ने माग गरिन् ।

महिला, बालबालिका तथा ज्येष्ठ नागरिक मन्त्री समेत सहभागि कार्यक्रममा अर्का सांसद गंगा चौधरीले क्वारेन्टाइनमै महिलामाथि हिंसाका घटनाहरु बढिरहेको भए पनि मन्त्रालय र समितिले तदारुकता नदेखाएको बताइन् । लकडाउनको समयमा सांसदहरुलाई आफ्नो गाउँ जान कुनै समस्या नभए पनि महिला हिंसा बढिरहेको क्षेत्रमा गएर अध्ययन गर्न के ले रोक्यो भन्दै प्रश्न गरिन् ।

उनले महँगा कार्पेट किन्नुभन्दा सीप भएका महिलाहरुलाई प्रोत्साहन गरी स्थानीय स्तरमा उत्पादन हुने गुन्द्री प्रयोग गर्न आग्रह गरिन् ।