अध्यक्ष ओलीद्वारा कम्बोडियामा निर्वाचन पर्यवेक्षण

काठमाडौं । नेकपा (एमाले)का अध्यक्ष केपी शर्मा ओलीले आज कम्बोडियामा भएको निर्वाचनको पर्यवेक्षण गर्नुभएको छ । उहाँले तीनवटा मतदान केन्द्रमा पुगी पर्यवेक्षण गर्नुभएको उहाँको सचिवालयले जनाएको छ ।

अध्यक्ष ओलीले आज बिहान टोल कोर्क प्रावि, हुन सेन प्रिक रेसे प्रावि र क्रोपर हा प्रावि मतदान केन्द्रमा पुगी निर्वाचनको पर्यवेक्षण गर्नुभयो । उहाँको सचिवालयका अनुसार मतदान केन्द्रमा शान्त वातावरणमा निर्वाचन भएको र ७० प्रतिशतभन्दा माथि मतदान सम्पन्न भएको छ ।

कम्बोडियामा सातौँ राष्ट्रिय व्यवस्थापिकाको एक सय २५ जना विधायकहरूको निर्वाचन सम्पन्न भएको छ । निर्वाचनमा तीन सय ३४ जना विदेशी पर्यवेक्षकले पर्यवेक्षणमा गरेका थिए ।

अध्यक्ष ओली कम्बोडिया सरकारको निमन्त्रणामा निर्वाचन पर्यवेक्षणका लागि यही साउन २ गते त्यसतर्फ जानुभएको थियो । उहाँको साथमा पत्नी राधिका शाक्य, उपमहासचिव विष्णु रिमाल, प्रमुख स्वकीय सचिव राजेश बज्राचार्य, स्वकीय फोटोग्राफर अधिकृत दिनेश भण्डारी रहनुभएको छ ।