उपराष्ट्रपति चयनका लागि आज मतदान, मत परिणाम आजै

३ फागुन, काठमाडौं । मुलुकको नयाँ उपराष्ट्रपति चयनका लागि शुक्रबार निर्वाचन हुँदैछ।

निर्वाचनका अन्तर्गत आज नयाँ बानेश्वरस्थित संघीय संसद् भवनको ल्होत्से हलमा बिहान १० बजेदेखि अपराह्न ३ बजेसम्म मतदान हुने छ ।

निर्वाचनमा नेकपा एमालेको तर्फबाट अष्टलक्ष्मी शाक्य, जनमत पार्टीबाट ममता झा र जनता समाजवादी पार्टी (जसपा), नेपालबाट रामसहायप्रसाद यादव उम्मेदवार रहेका छन्।

सहायक निर्वाचन अधिकृत शर्माका अनुसार उपराष्ट्रपति निर्वाचनमा सङ्घीय संसद्का सदस्यले रातो मसी र प्रदेशसभा सदस्यले मतदान गर्ने प्रयोजनका लागि हरियो मसीले मतपत्र छपाइ गरिएको छ।

मतदाताले मतपत्रमा उम्मेदवारको तस्बिर र नाम अङ्कित रहेको कोठामा स्वस्तिक छाप लगाई मतसङ्केत गर्नुपर्नेछ।

सङ्घीय संसद् सदस्यको मतभार ७९ र प्रदेशसा सदस्यको मतभार ४८ कायम रहेको छ।

निर्वाचनमा सङ्घीय संसद्का तीन सय ३२ र प्रदेशसभाका पाँच सय ५० सांसद मतदाता रहेका छन्।

मतदान सम्पन्न भएलगत्तै मतगणना सुरु हुने छ। साँझ ६ बजेभित्र मतगणना सक्काइ नतिजा आइसक्ने छ ।