युवा नेता गणेश लामाले दिए कांग्रेस केन्द्रिय सदस्यमा उम्मेदवारी

काठमाडौं । नेपाली कांग्रेसका युवा नेता गणेश लामाले केन्द्रिय सदस्य पदका लागि उम्मेदवारी दिएका छन् ।

लामाले राष्ट्रिय सभागृह पुगेर खुल्ला तर्फबाट केन्द्रिय सदस्यमा मनोनयन दर्ता गराएका हुन् । उनले सभापति शेर बहादुर देउवाको समुहबाट केन्द्रिय सदस्यमा मनोनयन दर्ता गराएका छन् ।

पछिल्लो पटक गण्डकी प्रदेशमा कांग्रेसको सरकार बनाउन लामाले खेलेको भूमिकाका कारण उनी कांग्रेसमा राम्रो राजनीतिक कौशल भएका युवा नेताको रुपमा गनिएका छन् ।

उनी यसअघि विजय गच्छदारको नेतृत्वको मधेशी जनअधिकार फोरम लोकतान्त्रिकमा थिए । गच्छदार कांग्रेस प्रवेश गरेपछि कांग्रेसमा समावेश भएका लामाले नेपाली कांग्रेसमा राम्रो राजनीतिक र संगठनात्मक पकड बनाएका छन् ।

आफूलाई केन्द्रीय सदस्यमा सबैतिरबाट सहयोग गर्ने प्रतिबद्धता आएकोले विजयी हुनेमा ढुक्क रहेको लामाले गोकर्णेश्वर खबरलाई बताए ।