सहज जितसंगै इन्टर लिगको दोस्रो स्थानमा

एजेन्सी। इटालियन सिरी ए फुटबलमा इन्टर मिलानले जित निकालेको छ ।

जिनोआको मैदानमा इन्टरलाई जित दिलाउन रोमेरो लुकाकुले दुई गोल गरे । त्यस्तै एलेक्सिस सान्चेजले एक गोल थपे ।

पहिलो हाफको ३४औं मिनेटमा लुकाकुले गोल गर्दै इन्टरलाई शुरुवाती अग्रता दिलाएका थिए ।

त्यस्तै खेलको ८३औं मिनेटमा सान्चेजले गोल गर्दै इन्टरलाई दुई शुन्यको अग्रता दिलाए ।

त्यसैगरी खेलको इन्जुरी समयमा लुकाकुले व्यक्तिगत दोस्रो गोल गर्दै इन्टरलाई तीन शुन्य गोल अन्तरको सहज जित दिलाए ।

घरेलु टोलीलाई हराएसँगै इन्टर लिगको दोस्रो स्थानमा समेत उक्लिएको छ ।

यो जितपछि इन्टरले ३६ खेलमा ७६ अंक जोडेको छ । एटलान्टालाई १ अंकले पछि पार्दै इन्टर दोस्रो स्थानमा उक्लिएको हो ।

इन्टर शीर्ष स्थानको युभेन्ट्स भन्दा ४ अंकले पछि रहेको छ । एक खेल कम खेलेको युभेन्ट्सको ८० अंक रहेको छ ।

युभेन्ट्सलाई उपाधि जित्न अब एक जितको आवश्यकता रहेको छ ।

जिनोआ ३६ अंक जोडेर १७औं स्थानमा रहेको छ ।

सिरी ए कै अर्को खेलमा पर्माले ब्रेसियालाई दुई एक गोल अन्तरले हराएको छ ।