नायिका साम्राज्ञी र भुवन केसी आरोप प्रत्यारोपमाः साम्राज्ञीले भनिन्- फिल्ममा कामगर्दा दुर्व्यवहारमा परे’

काठमाडौं – नायिका साम्राज्ञी राज्यलक्ष्मी शाहले आफू दुर्व्यवहारमा परेको बताएकी छिन् । केही दिनअघि उनले ३ वटा नेपाली फिल्ममा काम गर्दा दुव्यर्वहारमा परेको बताएकी थिइन् ।

उनले फिल्मको नाम सार्वजनिक नगरे पनि निर्माताको नियतमाथि प्रश्न उठाएकी थिइन् । फिल्म ‘ड्रिम्स’ मा काम गर्दा नराम्रो व्यवहार भोगेको उनले सांकेतिक रुपमा भिडियोमार्फत बताएकी थिइन् ।

त्यसको प्रतिक्रिया दिँदै अभिनेता तथा निर्माता भुवन केसीले एक टिप्पणी गरेका थिए । उक्त टिप्पणीमा भुवनले ‘जुन थालमा खायो, त्यही थालमा दुलो पार्ने’ भनेका थिए ।

भुवनको यो अभिव्यक्तिपछि साम्राज्ञीले पुनः अर्को भिडियो सार्वजनिक गर्दै आफूलाई गालामा टाँसिन आएर ‘तँ त मेरो प्रोडक्ट होस्’ भन्दै मिडियामा यस्ता कुरा बाहिर नल्याउन भनेको बताएकी छिन् ।

उनले भनेकी छिन्, ‘कति धेरै कुरा जुन मैले सहेर लुकाएर बसिरहेकी थिएँ ।’

उनले अरु मेकरले पनि यस्ता कुरा बाहिर नल्याउन भनेको पनि खुलासा गरेकी छिन् । साम्राज्ञीको यो खुलासापछि फ्यानले राम्रो गरेको प्रतिक्रिया दिएका छन् ।

‘मलाई जहिले पनि अरु मान्छेहरुले यो कुरा शेयर नगर्न भन्नुभएको थियो, उहाँहरुलाई थाहा छ कि, मलाई नराम्रो भएको थियो,’ साम्राज्ञीले भनेकी छिन् ।

आफ्नो करिअरमा धब्बा लाग्ला, फिल्ममा काम नपाउला भन्दै मेकरले कन्भिन्स गरेको पनि उनले बताएकी छिन् । अघिल्लो भिडियोमा कुनै पनि फिल्ममा दोहोर्‍याएर काम नगर्नुको कारण मेकरको व्यवहार भएको बताएकी थिइन् ।

‘मलाई चित्तै बुझ्दैनथ्यो, तर मैले चुप बसेकी थिएँ, त्यो बेला म मात्र भएको छु, मैले भोगेकी छु, मैले देखेकी छु,’ उनले भनेकी छिन्, ‘मेरो ठाउँमा हुनुहुन्थ्यो भने के थाहा तपाईंहरुले कसरी लिनुहुन्थ्यो । त्यतिबेलै केही गर्नुहुन्थ्यो होला ।’

डेब्यु फिल्म ‘ड्रिम्स’ मा अभिनय गर्दा नराम्रो व्यवहार भोगेको साम्राज्ञीले यसअघि पनि खुलासा गरेकी थिइन् ।

‘म त्यतिबेला बच्चा थिएँ । मलाई कसैले सम्झाउने भन्ने थिएन,’ साम्राज्ञीले भनिन् ।

उनले आफूलाई मन परेको कथामा लगनशीलताका साथ राम्ररी काम गरेको पनि दाबी गरिन् । भुवनले साम्राज्ञीको अभिनयलाई लिएर पनि प्रश्न गरेका थिए ।

‘उहाँहरुको फिल्म हिट भएको हो, उहाँहरुले नै मलाई काम दिनुभएको हो,’ साम्राज्ञीले भुवनको ‘जुन थालमा खायो त्यही थालमा दुलो पार्ने’ भनाइपछि भनेकी छिन् ।

उनले जापानमा एक अवार्ड समारोहका बेला निर्माता मुख जोडेर कुरा गरेको बताएकी छिन् । उनले भुवन केसीको नाम नलिए पनि साम्राज्ञीको आरोप उनीतिरै सोझिएको देखिन्छ ।
‘यो त एउटा उदाहरण मात्र हो, त्यसपछि मलाई कति जनाले के के गरेको छ, म चुप लागेर बसिरहेकी छु, यो कुरा शेयर गर्दा मलाई राम्रो अनुभव पनि भइरहेको छ,’ उनले भनेकी छिन् ।

साम्राज्ञीले आफूमाथि दुर्व्यवहार भएको सार्वजनिक गर्दा हलुका अनुभव गरेको तर यो सही हो या होइन भन्नेमा नछुट्याएको पनि बताएकी छिन् ।

यो टिप्पणीपछि भुवनले भने कुनै प्रतिक्रिया दिएका छैनन् ।