पुजा शर्माले नेपालमा १४ जिल्ला छन् भनेपछि..

काठमाडौं – कलाकार पूजा शर्मा ट्रोलको शिकार बनेकी छिन् । नेपालमा कति जिल्ला छन् भन्ने समेत भन्न नसकेपछि उनको चौतर्फी विरोध भएको छ ।

प्राइम टाइम्सको भिडियो अन्तर्वार्तामा पत्रकार प्रकाश सुवेदीलाई दिएको अन्तर्वार्तामा पूजाले नेपालमा १४ जिल्ला भएको बताएकी थिइन् ।

उनलाई पत्रकार सुवेदीले सोधेका थिए – नेपालमा यतिखेर कतिवटा प्रदेश छन् ?

यसको जवाफमा कलाकार पूजा शर्माले ७२ वटा भएको भन्दै अकमकाएकी थिइन् । यो प्रश्नको उत्तर दिन नसकेपछि उनलाई सुवेदीले नेपालमा कतिवटा जिल्ला छन् भनेर प्रश्न सोधेका थिए ।

पूजाले नेपालमा १४ वटा जिल्ला भएको उत्तर दिएकी थिइन् । यो भिडियो फुटेज सामाजिक सञ्जालमा भाइरल भएको छ भने नेपाली कलाकारको अज्ञानतामाथि पनि प्रश्न उठाइएको छ ।

प्राइम टिभीको युट्युब च्यानलमा अपलोड गरिएको उक्त भिडियो हटाइएको छ । भिडियो किन हटाइयो भन्ने खुलाइएको छैन ।

के थियो भिडियोमा ?

अन्तर्वार्ता दिन पुगेकी पूजासँग प्रकाश सुवेदीले लामो समय कुरा गरेका थिए । कुराकानीका सिलसिलामा पत्रकार सुवेदीले एकछिन बाहिरी कुरा गरौं न भन्दै राजनीतिक नेताहरुका बारेमा सोध्छन् ।

उनले नेपालका अर्थमन्त्रीको नाम सोध्छन् । पूजाले उत्तर दिन नसकेपछि पूर्वसञ्चारमन्त्रीको नाम सोध्छन् ।
सुवेदीको प्रश्नको उत्तरमा पूजाले आफूलाई थाहा नभएको प्रतिक्रिया दिन्छिन् । कार्यक्रममा पूजालाई हालका अर्थमन्त्री युवराज खतिवडा र पूर्वसञ्चारमन्त्री गोकुल बाँस्कोटा भएको बताउँछन् ।

उनलाई सोधिएको ५ मन्त्रीको नाम पनि पूजाले भन्न सक्दिनन् । पत्रकारले पुनः ३ मन्त्रीको नाम भन्न अनुरोध गर्छन् । जवाफमा पूजाले बामदेव गौतम, प्रचण्ड र बाबुराम भट्टराईको नाम लिन्छिन् ।

पूजालाई मन्त्रीको नाम भन्न गाह्रो लागेपछि सुवेदीले सजिला प्रश्न भन्दै जिल्लाको नाम र प्रदेशका नाम सोधेका थिए । पूजाले नेपालमा १४ जिल्ला भएको बताएकी थिइन् । नेपालमा प्रदेश भने ७२ वटा भएको भन्दै अकमकाएकी थिइन् ।

कार्यक्रममा उनले राजनीतिप्रति कुनै चासो नभएको पनि प्रतिक्रिया दिएकी थिइन् ।

नेपाली कलाकारलाई सामान्य ज्ञानसमेत नभएको भन्दै पूजा शर्मालाई ट्रोल बनाइएको छ । यी कलाकार बेलाबेलामा आफ्नो अभिव्यक्तिका कारण विवादमा आइरहन्छिन् ।